My heart was ance as blyth and free
As Summer days were lang
But a bonnie westlin weaver lad
Has gart me change my song
Chorus.
Tae the weavers gin ye go fair maid
Tae the weaver’ gin ye go
I rede ye richt, gang ne’er at nicht
Tae the weavers gin ye go
.
My mither sent me tae the toon
Tae warp a plaiden wab
But the weary weary warpin o’t
Has gart me sigh and sab
.
A bonnie weslin weaver lad
Sat workin at his loom
He took my heart as wi a net
In every knot a thrum
.
I sat beside my warpin-wheel
And ay I ca’d it roun
But every shot and every knock
My heart it gae a stoun.
.
The moon was sinkin in the west
Wi’ visage pale and wan
As my bonnie weslin weaver lad
convoy’d me thro the glen
.
But what was said or what was done
Shame fa’ me gin I tell
But Oh, I fear the kintra soon
Will ken as weel’s mysel.